நித்திய ஜீவன்

இயேசு சொல்லர்த்தமாகவே அந்த அப்பத்தை தம்முடைய உடலாகவும், திராட்சரசத்தை தம்முடைய இரத்தமாகவும் மாற்றியதாகச் சிலர் நம்புகிறார்கள். ஆனால், இயேசு அந்த அப்பத்தைக் கொடுத்த சமயத்தில், அவருடைய மாமிச உடல் எந்தக் குறையும் இல்லாமல் நல்லபடியாகவே இருந்தது. இயேசுவின் அப்போஸ்தலர்கள் நிஜமாகவே அவருடைய உடலையும் இரத்தத்தையும் புசித்துக்கொண்டிருந்தார்களா? இல்லை, ஏனென்றால் அது நரமாமிசத்தைச் சாப்பிடுவதாக ஆகி இருக்கும், கடவுளுடைய சட்டத்தை மீறுவதாய் இருந்து இருக்கும்.

ஆதியாகமம் 9 : 3. நடமாடுகிற ஜீவஜந்துக்கள் யாவும், உங்களுக்கு ஆகாரமாய் இருப்பதாக; பசும் பூண்டுகளை உங்களுக்குத் தந்ததுபோல, அவைகள் எல்லாவற்றையும் உங்களுக்குத் தந்தேன்.
4. மாம்சத்தை அதின் உயிராகிய இரத்தத்தோடே புசிக்கவேண்டாம்.
லேவியராகமம் 17 : 10. இஸ்ரவேல் குடும்பத்தாரிலும் உங்களுக்குள் தங்கும் அந்நியர்களிலும் எவனாகிலும் இரத்தம் என்னப்பட்டதைப் புசித்தால், இரத்தத்தைப் புசித்த அவனுக்கு விரோதமாக நான் என் முகத்தைத் திருப்பி, அவன் தன் ஜனத்தில் இராதபடிக்கு அவனை அறுப்புண்டுபோகப் பண்ணுவேன்.

''போஜனம்பண்ணினபின்பு அவர் அந்தப்படியே பாத்திரத்தையும் கொடுத்து: இந்தப் பாத்திரம் உங்களுக்காகச் சிந்தப்படுகிற என்னுடைய இரத்தத்தினாலாகிய புதிய உடன்படிக்கையாயிருக்கிறது என்றார்''. என்று இயேசு சொன்னதாக லூக்கா 22 :20 - ல் பதிவு செய்யப்பட்டுள்ளது. இந்தப்பாத்திரம் சொல்லர்தமாகவே 'புதிய உடன்படிக்கையாக' மாறியதா? அப்படி ஆகி இருக்கவே முடியாது, ஏனெனில் உடன்படிக்கை என்பது ஒரு பொருள்ளல்ல, அது ஓர் ஒப்பந்தம். தொடரும்....

இராப்போஜனம் குறித்த சகோ.டினோவின் பதிவுகள் அனைத்தும் வேத போதனைக்கு உட்பட்டதாகவே அறிகிறேன்.

ஆகிலும் புதிய ஏற்பாட்டின் “இராப்போஜனம் மற்றும் ஞானஸ்நானம்” ஆகியவை, பழைய ஏற்பாட்டின் “விருத்தசேதனம் மற்றும் பலி” ஆகியவற்றிற்கு ஒத்ததாகவே நான் கருதுகிறேன்.

விருத்தசேதன கட்டளை என்பது நித்திய உடன்படிக்கையாகத்தான் இஸ்ரவேலர்களுக்குக் கொடுக்கப்பட்டது.

ஆதியாகமம் 17:13,14 உன் வீட்டிலே பிறந்த பிள்ளையும், உன் பணத்திற்குக் கொள்ளப்பட்டவனும், விருத்தசேதனம் பண்ணப்படவேண்டியது அவசியம்; இப்படி என் உடன்படிக்கை உங்கள் மாம்சத்திலே நித்திய உடன்படிக்கையாக இருக்கக்கடவது. நுனித்தோலின் மாம்சம் விருத்தசேதனம்பண்ணப்படாதிருக்கிற நுனித்தோலுள்ள ஆண்பிள்ளையிருந்தால், அந்த ஆத்துமா என் உடன்படிக்கையை மீறினபடியால், தன் ஜனத்தில் இராதபடிக்கு அறுப்புண்டுபோவான் என்றார்.

இப்படி நித்திய உடன்படிக்கையாகவும், விருத்தசேதனம் செய்யாதவன் அறுப்புண்டு சாவான் என்ற அளவுக்கு கண்டிப்பானதாகவும் கொடுக்கப்பட்ட விருத்தசேதன கட்டளையே ஒன்றுமில்லை என பவுல் கூறுகிறார்.

1 கொரி. 7:19 விருத்தசேதனமும் ஒன்றுமில்லை, விருத்தசேதனமில்லாமையும் ஒன்றுமில்லை; தேவனுடைய கற்பனைகளைக் கைக்கொள்ளுகிறதே காரியம்.

ரோமர் 2:28,29 ஆதலால் புறம்பாக யூதனானவன் யூதனல்ல, புறம்பாக மாம்சத்தில் செய்யப்படும் விருத்தசேதனமும் விருத்தசேதனமல்ல. உள்ளத்திலே யூதனானவனே யூதன்; எழுத்தின்படி உண்டாகாமல், ஆவியின்படி இருதயத்தில் உண்டாகும் விருத்தசேதனமே விருத்தசேதனம்; இப்படிப்பட்டவனுக்குரிய புகழ்ச்சி மனுஷராலே அல்ல, தேவனாலே உண்டாயிருக்கிறது.

நித்திய உடன்படிக்கையான விருத்தசேதனமே ஒன்றுமில்லையென்றும், தேவனுடைய கற்பனைகளைக் கைக்கொள்வதே முக்கியம் என்றும் பவுல் கூறுகிறார்.

அவ்வாறே பலியைக் குறித்து பற்பல விதமான கண்டிப்பான பல கட்டளைகளை தேவன் கொடுத்திருந்த போதிலும், இயேசு பின்வருமாறு கூறினார்.

மத்தேயு 12:7 பலியையல்ல இரக்கத்தையே விரும்புகிறேன் என்பதின் கருத்து இன்னதென்று அறிந்தீர்களானால், குற்றமில்லாதவர்களை நீங்கள் குற்றப்படுத்தமாட்டீர்கள்.

தேவனும்கூட தமது தீர்க்கதரிசி மூலம் பின்வருமாறு கூறினார்.

ஏசாயா 1:10,11 சோதோமின் அதிபதிகளே, கர்த்தருடைய வார்த்தையைக் கேளுங்கள்; கொமோராவின் ஜனமே, நமது தேவனுடைய வேதத்துக்குச் செவிகொடுங்கள்.
உங்கள் பலிகளின் திரள் எனக்கு என்னத்துக்கு என்று கர்த்தர் சொல்லுகிறார்; ஆட்டுக்கடாக்களின் தகனபலிகளும், கொழுத்த மிருகங்களின் நிணமும் எனக்கு அரோசிகமாயிருக்கிறது; காளைகள், ஆட்டுக்குட்டிகள், கடாக்களுடைய இரத்தத்தின்மேல் எனக்குப் பிரியமில்லை. (தொடர்ந்து 20-ம் வசனம் வரை படித்துப் பார்க்கவும்)

இப்படியிருக்க, கண்டிப்பாக இல்லாமல் தமது நினைவுகூருதலுக்காக மட்டும் செய்யும்படி இயேசு கேட்டுக்கொண்ட இராப்போஜன ஆசரிப்பு நிச்சயம் பிரதானமானதல்ல என்பது எனது கருத்து.

இதைக் குறிப்பிட்ட நாளில் செய்யும்படி பிரயாசப்படுவோரை நான் எவ்விதத்திலும் குறைவாகக் கருதவில்லை. ஆனால் இதற்காக எடுக்கிற பிரயாசத்தைக்காட்டிலும் பலமடங்கு பிரயாசத்தை இயேசுவின் கற்பனைகளைக் கைக்கொள்வதில் எடுக்காதிருந்தால், இராப்போஜன பிரயாசத்தால் பிரயோஜனம் ஒன்றுமில்லை என நான் கருதுகிறேன்.

அவ்வாறே சடங்காச்சார தண்ணீர் ஞானஸ்நானத்தை கட்டாயமாகக் கருதி அதைப் பிரதானப்படுத்துவதாலும் பயனில்லை என நான் கருதுகிறேன்.

ஞானஸ்நானத்தைப் பற்றி பல வசனங்களில் எழுதின பவுல்கூட, ஞானஸ்நான அடிப்படையில் பிரிவினைகள் உண்டானபோது பின்வருமாறு கூறினார்.

 1 கொரி. 1:17 ஞானஸ்நானத்தைக் கொடுக்கும்படி கிறிஸ்து என்னை அனுப்பவில்லை; சுவிசேஷத்தைப் பிரசங்கிக்கவே அனுப்பினார்; கிறிஸ்துவின் சிலுவை வீணாய்ப்போகாதபடிக்கு, சாதுரிய ஞானமில்லாமல் பிரசங்கிக்கவே அனுப்பினார்.

இந்நாட்களில் பவுல் நம்மிடையே இருந்தால், நம் மத்தியில் ஞானஸ்நானத்தை வலியுறுத்திக்கொண்டும் அதனடிப்படையில் பிரிவினையை உண்டாக்கிக்கொண்டும் இருப்பவர்களைப் பார்த்து இப்படித்தான் கூறியிருப்பார்.

“ஞானஸ்நானமும் ஒன்றுமில்லை, ஞானஸ்நானமில்லாமையும் ஒன்றுமில்லை; தேவனுடைய கற்பனைகளைக் கைக்கொள்ளுகிறதே காரியம்.”

பழைய ஏற்பாட்டின் விருத்தசேதனம் மற்றும் பலியை நிறைவேற்றுவதில் சரீர வேதனையும் உண்டு, பண இழப்பும் உண்டு, பொருள் இழப்பும் உண்டு. ஆனால் புதிய ஏற்பாட்டின் ஞானஸ்நானம் மற்றும் இராப்போஜன ஆசரிப்பில் சரீர வேதனையும் கிடையாது, பண இழப்பும் கிடையாது, பொருள் இழப்பும் கிடையாது. எனவே ஞானஸ்நானம் மற்றும் இராப்போஜன ஆசரிப்புகள் மிக மிக எளிதானவைகளே.

இவற்றை ஆசரித்தால்தான் நித்தியஜீவன் என்ற அடிப்படையில் எந்த வசனமும் இல்லை. ஆனால் பிறரோடு அன்புகூர்தல் மற்றும் பரிசுத்த வாழ்வு வாழ்தல் போன்றதன் அடிப்படையிலான கற்பனைகளைக் கைக்கொண்டால்தான் நித்தியஜீவன் எனக் கூறுகிற வசனங்கள் பலவுண்டு. எனவேதான் அவற்றையே நான் எப்போதும் பிரதானமாகக் கூறி வலியுறுத்தி வருகிறேன்.

சகோ.டினோ அவர்களே! இராப்போஜனம் சம்பந்தமான தங்கள் பதிவுகளை நான் சற்றும் மட்டுப்படுத்தவில்லை. ஆனால் இராப்போஜனத்தில் நாம் காட்டுகிற அக்கறையைக் காட்டிலும் பலமடங்கு அக்கறையை இயேசுவின் பிறகற்பனைகள் விஷயத்தில் எடுக்க நாம் கடமைப்பட்டுள்ளோம் என்பதை தள அன்பர்கள் புரிந்துகொள்ள வேண்டும் என்பதே எனது அவா.

தங்கள் பதிவுகளுக்கு நன்றி. தொடர்ந்து இராப்போஜனம் தொடர்பாக தாங்கள் கூறவிழைவதை சற்றும் தடங்கலின்றி கூறுங்கள்.