நித்திய ஜீவன்

சங்கீதம் 88:18 சிநேகிதனையும் தோழனையும் எனக்குத் தூரமாக விலக்கினீர்; எனக்கு அறிமுகமானவர்கள் மறைந்துபோனார்கள்.

சங்கீதக்காரனுக்கு நேர்ந்த இவ்வனுபவம், சமீபத்தில் எனக்கும் நேர்ந்ததை தள அன்பர்கள் அறிவார்கள். ஆம், ஒரு காலத்தில் பல வேதவிஷயங்களில் என்னோடு இணைந்து தோள் கொடுத்து பணிசெய்த தோழர் பெரியன்ஸ், தற்போது எனக்குத் தூரமாகிப் போனார்.

தகப்பன் தாயைக்கூட கிறிஸ்துவைக் காட்டிலும் அதிகமாக நேசிப்பவன் கிறிஸ்துவுக்குப் பாத்திரனல்ல என மத்தேயு 10:37 கூறுகிறது. கிறிஸ்துவினிமித்தம் வீடு, மனைவி, மக்கள் அனைத்தையும் இழக்க ஒருவன் முன்வரவேண்டும் என மாற்கு 10:29 கூறுகிறது.

அப்படியிருக்க தோழர் பெரியன்ஸ் எம்மாத்திரம்? எனவே வசனத்துக்கு விரோதமான அவரது போதனையை நான் எவ்வளவாய் எடுத்துரைத்த போதிலும் அதை ஏற்க மனமில்லாத அவரை விட்டு நான் விலகுகிறேன்.

அவரது தளத்தின் கருத்துக்கள் ஓரளவு வசனத்துக்கு இசைவாக இருந்ததால், அவரது தளத்தை இப்பகுதியில் சிபாரிசு செய்திருந்தேன். ஆனால் தற்போது மிகமிக முக்கியமான ஒரு விஷயத்தில் அவர் வசனத்துக்கு விரோதமான கருத்தில் இருப்பதால், அவரது தளத்திற்கு நான் தந்திருந்த சிபாரிசை தற்போது விலக்கிக் கொள்கிறேன்.

மாத்திரமல்ல, “எல்லோருக்கும் நித்திய ஜீவன்” எனும் அவரது தவறான போதனையில் சிக்கி யாரும் வஞ்சிக்கப்பட்டு போகவேண்டாம் என தள அன்பர்களை எச்சரிக்கிறேன்.