நித்திய ஜீவன்

சகோ.சுந்தர் அவர்களே!

இயேசுவின் இரத்தத்தால் பரிசுத்தமாக்கப்பட்ட அனைவரும் பரிசுத்தவான்கள்தான். இதன் அடிப்படையில்தான் நிருபங்களின் ஆரம்பத்தில் "பரிசுத்தவான்களுக்கு எழுதுவதாக" பவுல் குறிப்பிடுகிறார். ஆனால் பரிசுத்தவான்கள் என அழைக்கப்பட்ட அவர்களில் பலர், நடக்கைகளில் பரிசுத்தமாக இல்லை. பின்வரும் வசனங்கள் இதற்கு ஆதாரமாக உள்ளன.

1 கொரி. 5:1 உங்களுக்குள்ளே விபசாரம் உண்டென்று பிரசித்தமாய்ச் சொல்லப்படுகிறதே; ஒருவன் தன் தகப்பனுடைய மனைவியை வைத்துக்கொண்டிருக்கிறானே; அது அஞ்ஞானிகளுக்குள்ளும் சொல்லப்படாத விபசாரமாயிருக்கிறதே. 2 இப்படிப்பட்ட காரியஞ்செய்தவனை நீங்கள் உங்களைவிட்டு நீக்காமலும் துக்கப்படாமலும், இறுமாப்படைந்திருக்கிறீர்கள்.

எபேசியர் 4:17 ஆதலால், கர்த்தருக்குள் நான் உங்களுக்குச் சாட்சியாகச் சொல்லி எச்சரிக்கிறது என்னவெனில், மற்றப் புறஜாதிகள் தங்கள் வீணான சிந்தையிலே நடக்கிறதுபோல நீங்கள் இனி நடவாமலிருங்கள். 22 அந்தப்படி, முந்தின நடக்கைக்குரிய மோசம்போக்கும் இச்சைகளாலே கெட்டுப்போகிற பழைய மனுஷனை நீங்கள் களைந்துபோட்டு, 23 உங்கள் உள்ளத்திலே புதிதான ஆவியுள்ளவர்களாகி, 24 மெய்யான நீதியிலும் பரிசுத்தத்திலும் தேவனுடைய சாயலாகச் சிருஷ்டிக்கப்பட்ட புதிய மனுஷனைத் தரித்துக்கொள்ளுங்கள்.

25 அன்றியும், நாம் ஒருவருக்கொருவர் அவயவங்களாயிருக்கிறபடியால், பொய்யைக் களைந்து, அவனவன் பிறனுடனே மெய்யைப் பேசக்கடவன். 26 நீங்கள் கோபங்கொண்டாலும் பாவஞ்செய்யாதிருங்கள்; சூரியன் அஸ்தமிக்கிறதற்கு முன்னாக உங்கள் எரிச்சல் தணியக்கடவது; 27 பிசாசுக்கு இடங்கொடாமலும் இருங்கள். 28 திருடுகிறவன் இனித் திருடாமல், குறைச்சலுள்ளவனுக்குக் கொடுக்கத்தக்கதாகத் தனக்கு உண்டாயிருக்கும்படி, தன் கைகளினால் நலமான வேலைசெய்து, பிரயாசப்படக்கடவன். 29 கெட்ட வார்த்தை ஒன்றும் உங்கள் வாயிலிருந்து புறப்படவேண்டாம்; பக்திவிருத்திக்கு ஏதுவான நல்ல வார்த்தை உண்டானால் அதையே கேட்கிறவர்களுக்குப் பிரயோஜனமுண்டாகும்படி பேசுங்கள். 30 அன்றியும், நீங்கள் மீட்கப்படும் நாளுக்கென்று முத்திரையாகப் பெற்ற தேவனுடைய பரிசுத்தஆவியைத் துக்கப்படுத்தாதிருங்கள்.
31 சகலவிதமான கசப்பும், கோபமும், மூர்க்கமும், கூக்குரலும், தூஷணமும், மற்ற எந்தத் துர்க்குணமும் உங்களைவிட்டு நீங்கக்கடவது. 32 ஒருவருக்கொருவர் தயவாயும் மனஉருக்கமாயும் இருந்து, கிறிஸ்துவுக்குள் தேவன் உங்களுக்கு மன்னித்ததுபோல, நீங்களும் ஒருவருக்கொருவர் மன்னியுங்கள்.

இப்படி பல வசனங்களைக் காட்டமுடியும். கிறிஸ்துவின் இரத்தத்தால் பரிசுத்தமாக்கப்பட்டவர்கள், தங்கள் நடக்கைகளில் முடிவுபரியந்தம் பரிசுத்தத்தைக் காத்துக் கொண்டால்தான், வெளி. 20:6 கூறுகிற பரிசுத்தவான்களாக அவர்கள் ஆகமுடியும். அவர்கள்தான் கிறிஸ்துவோடுகூட உலகத்தை ஆளுகை செய்யும் பாக்கியத்தைப் பெறமுடியும்.

எனவே நிருபங்களில் கூறப்பட்டுள்ள பரிசுத்தவான்களில் எவர்கள் முடிவுபரியந்தம் பரிசுத்தத்தைக் காத்துக்கொண்டார்களோ, அவர்களையே “பரிசுத்தவான்கள்” என வெளி. 20:6 கூறுகிறது.

பரிசுத்தவான்கள் வேறு, இயேசுவின் கற்பனைகளின்படி வாழ்ந்தவர்கள் வேறு என்கிறீர்கள். உங்களது இக்கருத்து சரியல்ல என்பதற்கு பின்வரும் வசனம் ஆதாரமாயுள்ளது.

வெளி 14:12 தேவனுடைய கற்பனைகளையும் இயேசுவின் மேலுள்ள விசுவாசத்தையும் காத்துக்கொள்ளுகிறவர்களாகிய பரிசுத்தவான்களுடைய பொறுமை இதிலே விளங்கும் என்று கூறினான்.

இவ்வசனத்தை நீங்களும் மேற்கோள் காட்டியுள்ளீர்கள்; ஆனால் இவ்வசனம் தேவனுடைய கற்பனைகளைக் காத்துக்கொள்பவர்களைப் பற்றித்தான் கூறுகிறதேயன்றி கிறிஸ்துவின் கற்பனைகளைக் காத்துக்கொள்பவர்களைப் பற்றி கூறவில்லை என்கிறீர்கள்.

கிறிஸ்துவின் கற்பனைகள் யாவும் தேவனுடைய கற்பனைகளே என்பதை அறியீர்களா சகோதரரே! பின்வரும் வசனத்தைப் படியுங்கள்.

யோவான் 14:24 என்னில் அன்பாயிராதவன் என் வசனங்களைக் கைக்கொள்ளமாட்டான். நீங்கள் கேட்கிற வசனம் என்னுடையதாயிராமல் என்னை அனுப்பின பிதாவினுடையதாயிருக்கிறது.

பழைய ஏற்பாட்டில் தேவன் சொன்ன கற்பனைகள் போக, புதிய ஏற்பாட்டில் இயேசு சொன்ன கற்பனைகளும் தேவனுடைய கற்பனைகளே. அவரது கற்பனைகளையும் இயேசுவின் மீதுள்ள விசுவாசத்தையும் காத்துக்கொண்டவர்கள்தான் பரிசுத்தவான்கள். எனவே வெளி. 20:6 கூறுகிற பரிசுத்தவான்கள் யாவரும் “கிறிஸ்துவின் வார்த்தைகளின்படி வாழ்ந்தவர்களே”.

ஒருவேளை இதை ஒத்துக்கொள்ள உங்களுக்கு மனமில்லையெனில், பின்வரும் வசனங்களையும், அவ்வசனங்களின் அடிப்படையில் நான் எழுப்பியுள்ள கேள்விகளையும் படியுங்கள்.

யோவான் 14:24 என்னில் அன்பாயிராதவன் என் வசனங்களைக் கைக்கொள்ளமாட்டான்.

யோவான் 8:51-ஐச் சுட்டிக்காட்டி, இயேசுவின் வார்த்தையைக் கைக்கொள்பவன் மாமிச மரணத்தைக் காணமாட்டான் என்கிறீர்கள். ஆனால் பேதுரு, பவுல், யோவான் போன்ற அப்போஸ்தலர் அனைவரும் மாமிச மரணத்தைக் கண்டுள்ளனர். இதற்குக் காரணம் அவர்கள் இயேசுவின் வார்த்தைகளை முழுமையாகக் கைக்கொண்டிருக்க மாட்டார்கள் என்கிறீர்கள்; அப்படியானால் அவர்கள் இயேசுவின்மீது முழுமையாக அன்புகூரவில்லை எனச் சொல்லலாமா?

1 யோவான் 2:3 அவருடைய (கிறிஸ்துவினுடைய) கற்பனைகளை நாம் கைக்கொள்ளுகிறவர்களானால், அவரை அறிந்திருக்கிறோமென்பதை அதினால் அறிவோம். 4 அவரை அறிந்திருக்கிறேனென்று சொல்லியும், அவருடைய கற்பனைகளைக் கைக்கொள்ளாதவன் பொய்யனாயிருக்கிறான், அவனுக்குள் சத்தியமில்லை. 5 அவருடைய வசனத்தைக் கைக்கொள்ளுகிறவனிடத்தில் தேவ அன்பு மெய்யாகப் பூரணப்பட்டிருக்கும்; நாம் அவருக்குள் இருக்கிறோமென்பதை அதினாலே அறிந்திருக்கிறோம்.

இயேசுவின் வார்த்தைகளை முழுமையாகக் கைக்கொள்ளாததால் மரித்துப்போன பேதுரு, பவுல், யோவான் ஆகியோர், இயேசுவை முழுமையாக அறியவில்லை என்றும் அவர்கள் பொய்யர்கள் என்றும் கூறமுடியுமா?

யோவான் 14:15  நீங்கள் என்னிடத்தில் அன்பாயிருந்தால் என் கற்பனைகளைக் கைக்கொள்ளுங்கள்.

இயேசுவின் கற்பனைகளை முழுமையாகக் கைக்கொள்ளாததால் மரித்துப்போன பேதுரு, பவுல், யோவான் ஆகியோர் இயேசுவிடம் அன்புகூரவில்லை எனக் கூறமுடியுமா?

1 யோவான் 3:24 அவருடைய (கிறிஸ்துவினுடைய) கட்டளைகளைக் கைக்கொள்ளுகிறவன் அவரில் நிலைத்திருக்கிறான், அவரும் அவனில் நிலைத்திருக்கிறார்; அவர் நம்மில் நிலைத்திருக்கிறதை அவர் நமக்குத் தந்தருளின ஆவியினாலே அறிந்திருக்கிறோம்.

கிறிஸ்து தங்களில் நிலைத்திருப்பதை அறிந்துள்ளதாக யோவான் கூறுகிறாரே; அவ்வாறெனில் கிறிஸ்துவின் கற்பனைகளை யோவான் கைக்கொண்டிருப்பார் அல்லவா? கிறிஸ்துவின் கற்பனைகளைக் கைக்கொண்ட அவர் ஏன் யோவான் 8:51-ன் உங்கள் புரிந்துகொள்தலுக்கு மாறாக மரிக்க நேரிட்டது?

நன்கு சிந்தித்து, இக்கேள்விகளுக்கான பதில் காணுங்கள். அப்போது யோவான் 8:51-ஐ நீங்கள் தவறாகப் புரிந்துகொண்டதை உணர்வீர்கள்.