நித்திய ஜீவன்

சகரியா 12:10 ... அப்பொழுது அவர்கள் தாங்கள் குத்தின என்னை நோக்கிப்பார்த்து, ஒருவன் தன் ஒரே பேறானவனுக்காகப் புலம்புகிறதுபோல எனக்காகப் புலம்பி, ஒருவன் தன் தலைச்சன் பிள்ளைக்காகத் துக்கிக்கிறதுபோல எனக்காக மனங்கசந்து துக்கிப்பார்கள்.

இவ்வசனத்தை தீர்க்கதரிசி மூலமாக தேவனாகிய கர்த்தரே கூறுகிறார். ஆனால் இவ்வசனங்களில் கூறப்பட்டுள்ள தீர்க்கதரிசன வாசகங்கள் யாவும் இயேசுவுக்கே பொருத்தமாயுள்ளன. ஆதாரம்:

வெளி. 1:7 இதோ, மேகங்களுடனே வருகிறார்; கண்கள் யாவும் அவரைக் காணும், அவரைக் குத்தினவர்களும் அவரைக் காண்பார்கள்; பூமியின் கோத்திரத்தாரெல்லாரும் அவரைப் பார்த்துப் புலம்புவார்கள். அப்படியே ஆகும், ஆமென்.

யோவான் 19:37 அல்லாமலும் தாங்கள் குத்தினவரை நோக்கிப்பார்ப்பார்கள் என்று வேறொரு வேதவாக்கியம் சொல்லுகிறது.

இவ்வசனங்களை சகரியா 12:10-உடன் இணைத்துப் பார்க்கையில், யெகோவா தேவனே இயேசுவாக இப்பூமியில் அவதரித்தார் என்றும் யெகோவா தேவனும் இயேசுவும் ஒருவரே என்றும் நாம் கருத நேரிடுகிறது. ஆனால் இப்படி நாம் கருதுவது, இயேசுவை தேவனுடைய குமாரன் என நேரடியாகச் சொல்கிற பல வசனங்களுக்கு (மத்தேயு 14:33; 16:16; 17:5; 26:63,64; 27:54; மாற்கு 1:1; லூக்கா 1:32-35; யோவான் 1:34,39; 3:18; 5:18-26; 9:35; 10:36; 11:4; 17:2; 20:31; ரோமர் 1:9; 1 யோவான் 1:3; 3:8) முரணாக இருக்கிறது.

இம்மாதிரி முரண்பாடுகளை வேதாகமத்தில் காண்கையில், முரண்பாட்டிற்கான காரணத்தைக் கண்டறிந்து அதைக் களைய முற்படுவதே சரி. ஆனால் நாமோ முரண்பாடுகளைக் கண்டுகொள்ளாமல் விட்டுவிடுகிறோம், அல்லது முரண்பாடான 2 கருத்துக்களையும் ஏற்றுக்கொண்டு அவற்றின் அடிப்படையில் குழப்பமான ஒரு கோட்பாட்டை உருவாக்கிவிடுகிறோம்,

இப்படித்தான் சகரியா 12:10-ன் சரியான கருத்தை அறியாமல், அவ்வசனத்தின் அடிப்படையில் யெகோவா தேவனும் இயேசுவும் ஒருவரே எனும் வினோதமான கருத்தைச் சொல்லி, நாமும் குழம்பி, மற்றவர்களையும் குழப்பி வருகிறோம். இதைக் குறித்து நாம் ஆராய்ந்து பார்க்கையில், சகரியா 12:10-ன் மொழிபெயர்ப்பில் பிழை இருப்பதை அறியமுடிகிறது.

அப்பிழையை அறிந்துகொள்ள, தமிழ் வேதாகமத்துக்கு அடுத்தபடியாக நாம் அதிகமாகப் பயன்படுத்துகிற KJV ஆங்கில வேதாகமத்தில் அதன் மொழிபெயர்ப்பை முதலாவதாகப் பார்ப்போம்,

Zech 12:10 ... they shall look upon me whom they have pierced, and they shall mourn for him, as one mourneth for his only son, and shall be in bitterness for him, as one that is in bitterness for his firstborn.

தமிழ் வேதாகமத்தில் “என்னை, எனக்காக” என மொழிபெயர்க்கப்பட்ட வார்த்தைகள், KJV-ல் “me, him" என மொழிபெயர்க்கப்பட்டுள்ளன. இந்த ஒரு வித்தியாசமே போதும், இவ்வசனத்தின் மொழிபெயர்ப்பில் குளறுபடி உள்ளது என்பதற்கு. இதேவிதமான பொழிபெயர்ப்பு NIV, ASV வேதாகமங்களிலும் காணப்படுகிறது.

இத்தோடு குளறுபடி நிற்கவில்லை; வேறு சில ஆங்கில மொழிபெயர்ப்புகளில், வசனம் முழுவதுமே “him" என்றுதான் மொழிபெயர்க்கப்பட்டுள்ளது. உதாரணமாக Living Bible மொழிபெயர்ப்பைப் பார்ப்போம்,

They will look on him they pierced, and mourn for him as for an only son, and grieve bitterly for him as for an oldest child who died.

இதேவிதமான மொழிபெயர்ப்பு, Revised Standard, New Jerusalem with Apocrypha, New American with Apocrypah வேதாகமங்களிலும் காணப்படுகிறது.

இப்படி 3 விதமான மொழிபெயர்ப்புகள் இருக்கையில், எந்த மொழிபெயர்ப்பை reliable ஆக நாம் எடுக்க முடியும்?

எந்த மொழிபெயர்ப்பு பிற வசனங்களுடன் முரண்படாமல் இருக்கிறதோ அதைத்தான் ஓரளவு reliable- ஆக எடுக்க முடியும். அந்த வகையில் பார்த்தால், Living Bible மொழிபெயர்ப்பைத்தான் reliable ஆக எடுக்க முடியும். அதன் தமிழாக்கம்:

சகரியா 12:10 அவர்கள் தாங்கள் குத்தின அவரை நோக்கிப்பார்த்து, ஒருவன் தன் ஒரே பேறானவனுக்காகப் புலம்புகிறதுபோல அவருக்காகப் புலம்பி, ஒருவன் தன் தலைச்சன் பிள்ளைக்காகத் துக்கிக்கிறதுபோல அவருக்காக மனங்கசந்து துக்கிப்பார்கள்.

இம்மொழிபெயர்ப்பு, வெளி. 1:7 மற்றும் யோவான் 19:37 வசனங்களுடன் முரண்படாமல் கருத்திசைவுடன் இருப்பதைக் காணலாம். குறிப்பாக, “அல்லாமலும் தாங்கள் குத்தினவரை நோக்கிப்பார்ப்பார்கள் என்று வேறொரு வேதவாக்கியம் சொல்லுகிறது” எனும் யோவான் 19:37-ன் வாசகத்திற்கு மிகவும் பொருத்தமாக, “தாங்கள் குத்தின அவரை நோக்கிப்பார்த்து” எனும் வாசகம் உள்ளது.

எனவே சகரியா 12:10-ஐப் பொறுத்தவரை Living Bible வேதாகமத்தின் மொழிபெயர்ப்பே சரியானது என எடுத்துக்கொள்ளலாம்.