நித்திய ஜீவன்

ரோமர் 9-ம் அதிகாரத்தின் சில விஷயங்களின் அடிப்படையில், எமது “பூரண சற்குணராகுங்கள்” பத்திரிகையின் மார்ச் 2009 இதழில் கேட்கப்பட்ட சில கேள்விகளும் அவற்றிற்கான பதிகளும்:

கேள்வி: ரோமர் 9:10-21 வசனங்களில் பவுல் கூறியுள்ள சில விஷயங்கள் சம்பந்தமான பின்வரும் கேள்விகளுக்கு பதில் தரும்படி வேண்டுகிறேன்.
1. தன் தாயின் வயிற்றில் நல்வினை தீவினை ஒன்றும் அறியாத நிலையில் இருந்த ஏசாவை தேவன் வெறுத்தது முறையா?
2. ஓர் குயவன் தன் விருப்பப்படி ஓர் மண்பாண்டத்தை உருவாக்குவதைப்போல, தேவனும் தமது விருப்பப்படி ஒவ்வொரு மனிதனையும் உருவாக்குவதாக பவுல் கூறுகிறார். அவ்விதமாக உருவாக்கப்பட்ட மனிதனின் செயல்களுக்கு அவனைப் பொறுப்பாக்க முடியுமா?   சகோ.S.பீட்டர் சுகந்தன், நாகர்கோவில்

பதில்: ரோமர் 9:11-13 வசனங்களை நீங்கள் தவறாகப் புரிந்துகொண்டதுதான் தங்கள் முதல் கேள்விக்கு காரணமாயுள்ளது.

அதாவது 11,13-ம் வசனங்கள் கூறுவதை இணைத்து, ஏசாவும் யாக்கோபும் நல்வினை தீவினை அறியாதவர்களாக ரெபெக்காளின் வயிற்றில் இருந்தபோதே தேவன் யாக்கோபைச் சிநேகித்து ஏசாவை வெறுத்ததாக தாங்கள் கருதுவதே தங்கள் முதல் கேள்விக்கு காரணமாயுள்ளது.

ஆனால் 11,12 வசனங்களுக்கிடையே இருப்பதைப் போன்ற நேரடித் தொடர்பு, 11,13 வசனங்களுக்கிடையே கிடையாது. அதாவது, 12-ம் வசனத்தில் காணப்படுகிற அறிவிப்பு மட்டுமே பிள்ளைகள் தாயின் வயிற்றில் இருந்தபோது கூறப்பட்டதாகும். 13-ம் வசனத்தில் கூறப்பட்ட வாசகம், பிள்ளைகள் பிறந்து, வளர்ந்து, மறைந்து, சந்ததியினர் பெருகியபின் கூறப்பட்டதாகும். எனவே அவ்வாசகம் தனிப்பட்ட ஏசா யாக்கோபைப் பற்றியதாயிராமல், அவர்களின் சந்ததியினரைப் பற்றியதாயிருக்கிறது. அவ்வாசகம் எப்போது, ஏன், யாரைப் பற்றிக் கூறப்பட்டது என்பதை பின்வரும் வசனங்களிலிருந்து நாம் அறியலாம்.

மல்கியா 1:2-4 கர்த்தர் சொல்லுகிறார்: ஏசா யாக்கோபுக்குச் சகோதரன் அல்லவோ? ஆகிலும் யாக்கோபை நான் சிநேகித்தேன். ஏசாவையோ நான் வெறுத்தேன்; அவனுடைய மலைகளைப் பாழும், அவனுடைய சுதந்தரத்தை வனாந்தரத்திலுள்ள வலுசர்ப்பங்களின் தாவும் ஆக்கினேன். ஏதோமியர்: நாம் எளிமைப்பட்டோம்; ஆனாலும் பாழானவைகளைத் திரும்பக் கட்டுவோம் என்று சொல்லுகிறார்கள்; அதற்குக் கர்த்தர்: அவர்கள் கட்டுவார்கள், நான் இடிப்பேன். அவர்கள் துன்மார்க்கத்தின் எல்லையென்றும், கர்த்தர் என்றைக்கும் சினம் வைக்கிற ஜனமென்றும் சொல்லப்படுவார்கள் என்கிறார்.

தனிப்பட்ட ஏசாவை தேவன் வெறுத்திருந்தால், ஏசாவின் நாட்களில் அவருடைய மலைகளைப் பாழாக்கி, அவருடைய சுதந்தரத்தை சர்ப்பங்களின் குடியிருப்பாக்கியிருக்க வேண்டும். ஆனால் தேவன் அவ்வாறு செய்ததாக வேதாகமம் கூறவில்லை. ஏசா எக்குறைவுமின்றி நிறைவோடிருந்ததாக ஆதியாகமம் 33:9 கூறுகிறது; ஏசாவின் குடும்பத்தார் யாவரும் ஒருமித்துக் குடியிருக்கக் கூடாதபடி அவர்களின் சம்பத்து மிகுதியாயிருந்ததாகவும், அவர்களின் மந்தையை அவர்கள் குடியிருந்த பூமி தாங்கக்கூடாததாக இருந்ததாகவும் ஆதியாகமம் 36:7 கூறுகிறது.

எனவே தனிப்பட்ட ஏசாவை தேவன் வெறுத்ததாக நிச்சயமாகக் கூறமுடியாது. துன்மார்க்கத்தின் எல்லையாக இருந்த ஏதோமியரையே தேவன் வெறுத்ததாக மல்கியா 1:3,4 வசனங்கள் கூறுகின்றன. எனவே தங்கள் முதல் கேள்வி எழுவதற்கான வாய்ப்பு வேதாகமத்தில் இல்லை என்றுதான் கூறவேண்டும்.

மாத்திரமல்ல, “மூத்தவன் இளையவனைச் சேவிப்பான்” எனும் அறிவிப்புகூட தனிப்பட்ட ஏசா யாக்கோபைப் பற்றியதாயிராமல், அவர்களின் சந்ததியினரான ஏதோமியர் மற்றும் இஸ்ரவேலரைப் பற்றியதாகவே உள்ளது.

ஆதியாகமம் 25:23-ல் காணப்படும் அவ்வறிவிப்பில், “மூத்தவன், இளையவன்” என மொழிபெயர்க்கப்பட்டுள்ள மூலப்பிரதி எபிரெய வார்த்தைகள், “ரேப், ஸ்தாவீர்” என்பதாகும். இவற்றிற்கான அர்த்தங்கள் ஆங்கிலத்தில், “abundant, little" என்பவையாகும்; தமிழில் “ஏராளம், குறைவு” என்பவையாகும்.

இந்த “ஏராளம், குறைவு” என்பவை அவ்வார்த்தைகள் அமைந்துள்ள இடத்தைப் பொறுத்து, அளவையோ, வயதையோ, எண்ணிக்கையையோ குறிப்பிடலாம் என அகராதி கூறுகிறது. ஆதியாகமம் 25:23-ன் முதன் 3 அறிவிப்புகளும் ஜனக்கூட்டத்தையே குறிப்பிடுவதாகும்.

ஆதி. 25:23 அதற்குக் கர்த்தர்: (அறிவிப்பு 1) இரண்டு ஜாதிகள் உன் கர்ப்பத்தில் உண்டாயிருக்கிறது; (அறிவிப்பு 2) இரண்டுவித ஜனங்கள் உன் வயிற்றிலிருந்து பிரியும், (அறிவிப்பு 3) அவர்களில் ஒரு ஜனத்தார் மற்ற ஜனத்தாரைப்பார்க்கிலும் பலத்திருப்பார்கள், (அறிவிப்பு 4) மூத்தவன் இளையவனைச் சேவிப்பான் என்றார்.

எனவே 4-வது அறிவிப்பும் ஜனக்கூட்டத்தைக் குறித்தே கூறுவதாக இருக்க வேண்டும். மேலும் இரட்டைப் பிள்ளைகளான ஏசாவும் யாக்கோபும் சம வயதுடையவர்கள் என்பதால், யாக்கோபைவிட ஏசா ஏராளமான வயது அதிகமானவர் எனக் கூற இயலாது.

எனவே 4-வது அறிவிப்பை “மூத்தவன் இளையவனைச் சேவிப்பான்” என மொழிபெயர்ப்பதைவிட, “ஏராளமான ஜனங்கள் கொஞ்ச ஜனங்களைச் சேவிப்பார்கள்” என மொழிபெயர்ப்பதே பொருத்தமானது.

மேலும், “மூத்தவன் இளையவனைச் சேவிப்பான்” எனும் அறிவிப்பு நிறைவேறியதற்கான ஆதாரமோ, சாத்தியக்கூறோ வேதாகமத்தில் காணப்படவில்லை. உண்மையில், இளையவனாகிய யாக்கோபுதான் மூத்தவனாகிய ஏசாவை 7 முறை வணங்கியதாக ஆதி. 33:3 கூறுகிறது. ஆனால் “அநேக ஜனங்கள் கொஞ்ச ஜனங்களைச் சேவிப்பார்கள்” எனும் அறிவிப்பு சரியாக நிறைவேறுவதை பின்வரும் வசனங்களில் காணலாம்.

உபாகமம் 7:7 சகல ஜனங்களிலும் நீங்கள் திரட்சியான ஜனமென்று கர்த்தர் உங்கள்பேரில் அன்புவைத்து உங்களைத் தெரிந்துகொள்ளவில்லை; நீங்கள் (ஏதோமியர் உட்பட) சகல ஜனங்களிலும் கொஞ்சமாயிருந்தீர்கள்.

2 சாமுவேல் 8:14 ஏதோமில் (தாவீது) தாணையங்களை வைத்தான்; ஏதோம் எங்கும் அவன் தாணையங்களை வைத்ததினாலே, ஏதோமியர் எல்லாரும் (இஸ்ரவேலரின் ராஜாவான) தாவீதைச் சேவிக்கிறவர்களானார்கள்;

எனவே ஆதியாகமம் 25:23-ன் 4-ம் அறிவிப்பு, “அநேக ஜனங்கள் கொஞ்ச ஜனங்களைச் சேவிப்பார்கள்” என்றே மொழிபெயர்க்கப்பட்டிருக்க வேண்டும். அவ்வறிவிப்பை பவுல் மேற்கோள் காட்டுகிற ரோமர் 9:12-ன் மூலப்பிரதி வார்த்தைகளின் அர்த்தத்தை ஆராய்ந்து பார்த்தால், அவ்வசனத்திலும் “அநேக ஜனங்கள் கொஞ்ச ஜனங்களைச் சேவிப்பார்கள்” என்றுதான் மொழிபெயர்க்கப்பட்டிருக்க வேண்டும் என நாம் அறியலாம்.

எனவே ரோமர் 12,13 வசனங்களில் கூறப்பட்டுள்ள அறிவிப்பும் வாசகமும் தனிப்பட்ட ஏசா யாக்கோபைக் குறிக்கவில்லை என்பதால், தனிப்பட்ட ஏசாவை தேவன் வெறுத்ததைக் குறித்து கேள்வி எழ வாய்ப்பிலை.

ஆயினும் அவரது சந்ததியினரான ஏதோமியரை தேவன் வெறுத்ததை பவுல் ஏன் மேற்கோள் காட்டுகிறார் எனும் கேள்வி நமக்கு எழக்கூடும். குறிப்பாக, இஸ்ரவேலரின் தெரிந்துகொள்தலைப் பற்றி 11,12 வசனங்களில் கூறிவிட்டு, அதையடுத்து ஏதோமியரை தேவன் வெறுத்ததை மேற்கோள் காட்டுவதால், இஸ்ரவேலரின் தெரிந்துகொள்தலுக்கும் ஏதோமியரை தேவன் வெறுத்ததற்கும் தொடர்பு உள்ளதா எனும் கேள்வி எழக்கூடும். இக்கேள்விக்கான பதிலை இனி பார்ப்போம்.

இஸ்ரவேலரைத் தேவன் தெரிந்துகொள்ள அவர்களின் கிரியை காரணமல்ல என்பதையே ரோமர் 9:11,12 வசனங்கள் மூலம் பவுல் எடுத்துரைக்கிறார். குறிப்பாக, அவர்களின் முற்பிதாவான யாக்கோபின் கிரியைகூட காரணமல்ல எனக் காட்டும்படி, பிள்ளைகள் ரெபெக்காளின் வயிற்றிலிருக்கும்போதே தமது தெரிந்துகொள்தலை தேவன் அவளிடம் அறிவித்ததை எடுத்துரைக்கிறார்.

இதையடுத்து 13-ம் வசனத்தில் ஏசாவை (அதாவது அவரது சந்ததியினரை) தேவன் வெறுத்ததை மேற்கோளிடுவதும், தேவனின் தெரிந்துகொள்தலின் தொடர்பாகத்தான் என்பது தெளிவாகக் காணப்படுகிறது. ஆனால் அத்தொடர்பு என்னவென்பதை பவுல் குறிப்பிடவில்லை. எனினும் பின்வரும் 2 விஷயங்களில் ஒன்றாகத்தான் அத்தொடர்பு இருக்குமென நாம் யூகிக்கலாம்.

1. பிள்ளைகள் தாயின் வயிற்றிலிருக்கும்போதே, ஏசாவின் சந்ததியினரை வெறுக்கவேண்டும் என தேவன் தீர்மானித்துவிட்டு, யாக்கோபின் சந்ததியினரைத் தெரிந்தெடுத்திருக்கவேண்டும்.

2. பிள்ளைகள் தாயின் வயிற்றிலிருக்கும்போதே, ஏசாவின் சந்ததியினரான ஏதோமியர் துன்மார்க்கத்தின் எல்லைக்குச் சென்று தமது வெறுப்புக்கு ஆளாவார்கள் என்பதை தீர்க்கதரிசனமாக அறிந்ததால், அவர்களைத் தவிர்த்துவிட்டு இஸ்ரவேலரைத் தெரிந்தெடுத்திருக்க வேண்டும்.

இவ்விரு விஷயங்களில், முதல் விஷயம் நடக்க சற்றும் வாய்ப்பில்லை. ஏனெனில் காரணமேயில்லாமல், ஏசாவின் வருங்கால சந்ததியினரை வெறுக்கவேண்டுமென தேவன் தீர்மானிப்பது, அவரைப் பட்சபாதமுள்ளவராகக் காட்டும். ஆனால் தேவன் பட்சபாதமுள்ளவரல்ல (உபாகமம் 10:17; அப்போஸ்தலர் 10:34; கலாத்தியர் 2:6). மேலும், உன் சகோதரனாகிய ஏதோமியனை அருவருக்காயாக என்றும், அந்நியரைச் சிநேகிப்பாயாக என்றும் இஸ்ரவேலருக்குக் கட்டளையிட்ட தேவன் (உபாகமம் 23:7; 10:19), அந்நியர் மீது அன்புவைத்து அவர்களுக்கு அன்னவஸ்திரம் கொடுக்கிறவரான தேவன் (உபாகமம் 10:18), துன்மார்க்கனின் சாவை விரும்பாத தேவன் (எசேக்கியேல் 18:32), ஏதோமியர் துன்மார்க்கத்தின் எல்லைக்குச் செல்லவேண்டும் என்றும் அதினிமித்தம் தாம் அவர்களை வெறுக்கவேண்டும் என்றும் வெகுகாலத்திற்கு முன்பே நிச்சயமாகத் தீர்மானித்திருக்க மாட்டார்.

ஆனால் 2-வது விஷயம் நடப்பதற்கு நிறையவே வாய்ப்புள்ளது. வெகுகாலத்திற்குப் பின் நடக்கப்போவதை, நம் தேவன் தீர்க்கதரிசனமாக அறியும் வல்லமையுள்ளவர் என வேதாகமம் தெளிவாகக் கூறுகிறது.

எனவே, பிற்காலத்தில் ஏதோமியர் துன்மார்க்கத்தின் எல்லைக்குச் செல்வார்கள் என்பதையும் அதினிமித்தம் தாம் அவர்களை வெறுக்கநேரிடும் என்பதையும் தீர்க்கதரிசனமாக தேவன் அறிந்ததால், ஏதோமியரைப் புறக்கணித்து, இஸ்ரவேலரை அவர் தெரிந்தெடுத்திருக்கக்கூடும்.

இதைக் குறித்த விபரம் வேதாகமத்தில் காணப்படவில்லையென்றாலும், தங்கள் சந்தேகத்தைப் போக்கவேண்டுமென்ற நோக்கத்தில், இப்படியும் நடந்திருக்கக்கூடும் என யூகத்தின் அடிப்படையிலேயே கூறியுள்ளோம். மற்றபடி, தேவனின் செயலில் நிச்சயமாக அநீதி இருக்காது என்பதால், அவர் ஏதோமியரை வெறுத்தது மற்றும் அதைப் போன்ற வெறெந்த செயலிலும் அவர் அநீதியுள்ளவர் என நாம் சொல்லக்கூடாது என்பதே பவுல் நமக்குக் கூறும் ஆலோசனை (ரோமர் 9:14).

ஏதோமியரின் துன்மார்க்கத்தினிமித்தம் அவர்களை வெறுத்த தேவன், அதற்குமுன் அவர்கள்மீது கரிசனையுள்ளவராக இருந்தார் என்பதற்கு இவ்வசனம் ஆதாரமாயுள்ளது.

உபாகமம் 2:4 ஜனங்களுக்கு நீ கட்டளையிடவேண்டியது என்னவென்றால்: சேயீரிலே குடியிருக்கிற ஏசாவின் புத்திரரான உங்கள் சகோதரரின் எல்லையைக் கடக்கப்போகிறீர்கள்; அவர்கள் உங்களுக்குப் பயப்படுவார்கள்; நீங்களோ மிகவும் எச்சரிக்கையாயிருங்கள்; 5 அவர்களோடே போர்செய்யவேண்டாம்; அவர்கள் தேசத்திலே ஒரு அடி நிலமும் உங்களுக்குக் கொடேன்; சேயீர் மலைநாட்டை ஏசாவுக்குச் சுதந்தரமாகக் கொடுத்திருக்கிறேன்.

மாத்திரமல்ல, இஸ்ரவேலர், ஏதோமியர், எகிப்தியர், புறஜாதியினர் என்ற வித்தியாசமின்றி இவ்வுலகில் அனைவர் மீதும் தேவன் அன்புகூர்ந்துள்ளார் எனப் பின்வரும் வசனம் கூறுகிறது.

யோவான் 3:16 தேவன், தம்முடைய ஒரேபேறான குமாரனை விசுவாசிக்கிறவன் எவனோ அவன் கெட்டுப்போகாமல் நித்தியஜீவனை அடையும்படிக்கு, அவரைத் தந்தருளி, இவ்வளவாய் உலகத்தில் அன்பு கூர்ந்தார்.

இவ்வுலகில் தாம் படைத்த ஜனங்கள் அனைவரின்மீதும் அன்புகூர்ந்த தேவன், அவர்கள் இழந்துபோன நித்தியஜீவனை மீண்டும் அடையும்படியாகத்தான் தமது குமாரனாகிய இயேசுவை இவ்வுலகிற்கு அனுப்பினார்.

இயேசுவை இவ்வுலகிற்கு அனுப்புதல், அவர் மூலம் மனுக்குலத்திற்குக் கிடைத்த இரட்சிப்பை உலகிற்கு நற்செய்தியாக அறிவித்தல் போன்ற பல திட்டங்களைச் செயல்படுத்துவதற்கான கருவியாகத்தான் இஸ்ரவேலரைத் தேவன் தெரிந்துகொண்டார்.

அந்தத் தெரிந்துகொள்தலால் உலகப்பிரகாரமான சில மேன்மைகளை இஸ்ரவேலர் பெற்றது மெய்தான். ஆனால் பரலோகப் பாக்கியங்களைப் பொறுத்தவரை இஸ்ரவேலர், ஏதோமியர், புறஜாதியினர் என்ற பாகுபடின்றி அனைவரும் அவற்றைப்பெற சமஉரிமையுடையவர்களே.

மேலும், “எவனிடம் அதிகம் கொடுக்கப்பட்டதோ அவனிடம் அதிகம் கேட்கப்படும்” என லூக்கா 12:48-ல் இயேசு கூறுகிறபடி, அதிகம் கொடுக்கப்பட்ட இஸ்ரவேலரிடம் அதிகம் கேட்கப்படவும் கூடும் என்பதோடு, தேவன் அவர்களிடம் கூறின பின்வரும் வசனத்தையும் இங்கு நினைவு கூர்வோமாக.

ஆமோஸ் 3:2  பூமியின் எல்லா வம்சங்களுக்குள்ளும் உங்களைமாத்திரம் அறிந்துகொண்டேன்; ஆகையால் உங்களுடைய எல்லா அக்கிரமங்களினிமித்தமும் உங்களைத் தண்டிப்பேன்.

2-வது கேள்விக்கான பதில் அடுத்த பதிவில் ....