நித்திய ஜீவன்

Face Book தளத்தில் Yauwana Janam எனும் புனைப் பெயரில் தற்போது தீவிர ஊழியம் செய்துவரும் ஓர் ஊழியர்(?), கடந்த காலங்களில் சில்சாம் எனும் புனைப்பெயரில் பெயரில் பல தளங்களில் ஊழியம்(?) செய்தவராவார். தனது உண்மையான பெயரை பகிரங்கமாக அறிவிக்காத இவர், இத்தளம் துவக்கப்பட்ட போது இதை விஷஜந்து என முகாந்தரமின்றி தூஷித்தவராவார்.

இவரது பிரதான தொழில் இத்தளம், இறைவன் தளம், மற்றும் கோவைபெரியன்ஸ் தளத்தை தரக்குறைவாக எழுதுவதுதான் என்பது அனைவரும் அறிந்ததே.

இவரது தரக்குறைவான எழுத்துக்களுக்கு திரித்துவவாதிகளின் மத்தியில் ஏக வரவேற்பு. குறிப்பாக TCS-ன் அற்புதராஜ், ராஜ்குமார், கொல்வின், ஜாண், ராபின், விஜயகுமார் போன்றவர்கள் இவரை வெகுவாக ஊக்கமளித்து வந்தனர்.

ஒரு காலகட்டத்தில் இவரது நடவடிக்கை எல்லை மீறிப்போனதால், இவரது எந்த விமர்சனத்துக்கும் பதிலளிக்கப் போவதில்லை எனும் முடிவுக்கு வந்தேன். இப்படியாக சில காலம் சென்றது. பின்னர், அநேக நபர்கள் Face Book தளத்திற்குச் சென்றனர். அப்போது சில்சாமும் அங்கு சென்று தனது பணியைத் தொடர்ந்தார். ஆனால் அங்கு ஏற்பட்ட ஒரு சலசலப்பால் இவரது கணக்கு முடக்கப்பட்டதென்றும், இவரது யௌவன ஜனம் தளத்தில் மூன்றாமவர் அத்துமீறி நுழைந்து தளப்பணியைக் கெடுத்ததாகவும் புகார் செய்தார்.

இப்புகாரை அவரது திரித்துவக் கூட்டாளிகளில் பலர் நம்பாததால், இவரைப் பொய்யர் என்று சொல்லி கிட்டத்தட்ட அனைவரும் குற்றஞ்சாட்டி இவரைத் தனிமைப்படுத்தினர். அவ்வேளையில் இவர் தந்த இவரது தன்னிலை விளக்கம் மிகவும் பரிதாபத்தைத் தூண்டுவதாக இருந்தது. தனது கூட்டாளிகளால் குற்றஞ்சாட்டப்பட்டு தனிமைப்படுத்த நிலையில் இருந்த இவரது தன்னிலை விளக்கம் உண்மையானதாக எனக்குத் தோன்றியது.

எனவே இவருடனான எனது கடந்தகால கசப்புகளை மறந்து, சிறுமைப்பட்டவனுக்கு நீதி செய்யுங்கள் எனும் வசனத்தின்படி (சங்.82:3), இந்த சில்சாம் சார்பாக நின்று அவருக்கு ஆதரவாகக் குரல் கொடுத்தேன். நிலைமை சரியானபின் இவர் நம்மீது மீண்டும் பாய்வார் என்பது தெரிந்தபோதிலும், இவருக்கு நான் ஆதரவளித்தேன். ஏனெனில் குறிப்பிட்ட அந்த விஷயத்தில் அவர் பொய் சொல்பவராவோ, அல்லது மற்ற அனைவரும் இவரைத் தனிமைப்படுத்துமளவு இவர் மாபாதகம் செய்ததாகவோ எனக்குத் தோன்றவில்லை.

எனது ஆதரவை அவரும் மகிழ்வுடன் ஏற்றுக்கொண்டார். இப்படியாக சில நாட்கள் செல்லவும், அவரது பழைய கூட்டாளிகளுடனான உறவு மீண்டும் துளிர்விட்டது. உடனே கொஞ்சங்கொஞ்சமாக மீண்டும் முருங்கை மரம் ஏற முற்பட்டார்; அதாவது பழைய குருடி கதவைத் திறடி கதையாக மீண்டும் கொஞ்சங்கொஞ்சமாக என்மீது அவதூறுகளைக் கொட்டத் தொடங்கினார். இதனால் நான் சற்றும் சலனமடையவில்லை; ஏனெனில் இது நான் எதிர்பார்த்ததானே!

ஆனால் சமீபத்தில் FB தளத்தில்,

கிறிஸ்தவம் மோசமானதா, ஊழியர்கள் மோசமானவர்களா..?

என்ற கட்டுரையில் பின்வருமாறு இவர் பதித்ததுதான் எனக்கு மிகுந்த அதிர்ச்சியைத் தந்தது.

//இதையெல்லாம் நேற்றிரவு இயேசு பெருமானே என் அறையில் பிரத்தியட்சமாகத் தோன்றி எழுதச் சொன்னார் என்று ரீல் சுற்ற எனக்கு விருப்பமில்லை. ஒருவேளை அப்படி சொன்னாலே என்னுடைய கருத்துக்களை ஏற்பார்கள் என்ற பரிதாப நிலையில் மார்க்கம் இருக்குமானால் அதற்கும் நான் தயாராக இருக்கிறேன்..!//

குறிப்பிட்ட ஒரு விஷயத்தில் இவர் பொய் சொல்லியிருக்க மாட்டார் என்று கருதி, இவருக்கு ஆதரவளித்த எனக்கு, இவ்வரிகளைப் படித்ததும், குறிப்பிட்ட அந்த விஷயத்திலும் இவர் பொய் சொல்லியிருப்பாரோ, நாம்தான் தவறாக இவரை ஆதரித்துவிட்டோமா என நினைக்கத் தோன்றியது.

இயேசுவை நேரில் பார்த்ததாக பொய் சொல்லத் தயங்காதவர், எந்தவொரு பொய்யையும் துணிகரமாகச் செய்வார் என உறுதியாகக் கூறலாம். இவர் பொய் சொல்லித்தான் இவரது (திரித்துவ) மார்க்கத்தை இவர் காப்பாற்ற வேண்டுமாம். இதுவே இவரது திரித்துவ மார்க்கம் ஒரு பொய்யான மார்க்கம் என்பதற்கு ஆதாரமாயுள்ளது.

இவர் சொல்வதைத்தான் பல திரித்துவவாதிகள் ஏற்கனவே செய்தும்வருகின்றனர். இயேசுவின் நேரடிக் கட்டளைகளுக்கு (மத்தேயு 4:10; 23:8-10) கீழ்ப்படிய மனமில்லாத இந்த திரித்துவக்கூட்டத்தார், அவரை ஆராதிப்பதன் மூலம் அவரை மகிமைப்படுத்துவதாக பெருமை பாராட்டிக் கொண்டிருக்கின்றனர்.

இந்த லட்சணத்தில் “கிறிஸ்துவை ஆராதனை செய்ய மறுக்கும் ஞானப்பிரகாசம்” என்ற தலைப்பில் கட்டுரை ஒன்றை எழுதி, என்னை நையாண்டி செய்துகொண்டும், நான் தோற்று ஓடிவிட்டதாக புரளி கிளப்பிக்கொண்டும் தன்னைத்தானே இந்த யௌவன ஜனம் பாராட்டிக் கொண்டார்.

பலியைக் காட்டிலும் கீழ்ப்படிதலையே விரும்புகிறேன் என தேவன் எவ்வளவாய் நேரடியாகச் சொல்லியுள்ள போதிலும், கீழ்ப்படிதலை புறக்கணித்துவிட்டு ஆராதனையைப் பிரதானப்படுத்துவதுதான் இந்தப் பொய்யரின் வேலையாக உள்ளது.

துஷ்டனைக் கண்டால் தூர ஓடு என தமிழ் பழமொழி சொல்கிறது. வேதமோ இரண்டொரு தரம் புத்திசொல்லிவிட்டு விலகு என்கிறது. இதன்படியே அவரைவிட்டு நான் விலகினேன். அவரோ நான் தோற்று ஓடிவிட்டதாகக் கொக்கரித்துக் கொண்டரிக்கிறார்.

இவர் இவ்வளவாய் பகிரங்கமாக தன்னைப் பொய்யர் எனக் காட்டிவிட்டபிறகும், இவரது (போலி) நண்பர்கள் இவருக்குத் தாலாட்டு பாடுகின்றனர். இவர்களெல்லாம் நீதி. 27:5 கூறுகிறபடி மறைவான சிநேகத்தையுடையவர்கள்.

கிறிஸ்தவர் என்ற பெயரைச் சொல்லிக்கொண்டு, “கிறிஸ்தவ மார்க்கத்தை வளர்க்க நான் பொய் சொல்லத் தயார்” என இவர் அறிவித்ததன் மூலம் இவர் கிறிஸ்தவர்களுக்கு மட்டுமல்ல, இவர் ஆராதிப்பதாகச் சொல்லும் கிறிஸ்துவுக்கும், சர்வ வல்லவரான தேவனுக்கும் தூஷணத்தை உண்டாக்கிவிட்டார்.

இவருக்குக் கைத்தாளம் போடுகிற கூட்டத்தாரிடம் சற்றாகிலும் மனச்சாட்சி இருந்தால், அவர்கள் இந்த யௌவன ஜனத்தைக் கடிந்துகொள்வார்களாக.